«Шоқан Уәлихановтың тағдыры мен мұрасы» кітабының авторы, QazaqGeography мүшесі Ермекбай Жарас кітабының тұсаукесерін өткізді. Запастағы майор Махаббат Ғабдулғаппарұлы Көптуров ұйымдастырған кездесу Ресей Қорғаныс министрлігінің Омбы кадет әскери корпусында өтті. Іс-шарада курсанттар ұлы Шоқан Уәлиханов туралы мағлұмат алды. Кеш соңында автор ғимарат кітапханасына кітаптарды сыйға тартты. Айта кетейік, 2025 жылы Омбы облыстық «Шоқан Уәлиханов атындағы орыс-қазақ достығы орталығы» қоғамдық ұйымы Шоқан Уәлихановтың туғанына 190 жыл толуына орай халықаралық ғылыми конференция өткізуді жоспарлап отыр.
Шоқан Уәлихановтың бұл өмірден кеткеніне көп жылдар өтсе де, оның мұрасы өміршең болуы маңызды. Шараға қатысушылардың барлығы да осынау құнды мұраны сақтап, келешек ұрпаққа жеткізуге ден қойған азаматтардың бар екеніне терең рухтанып, риза болды. Өйткені, тарихымыздың осындай жалынды қорғаушылары қалса, Шоқан Уәлихановтың рухы мәңгілік сақталады.
